అలవాట్లు/ఆచారాలు-1

మన పెద్దవాళ్ళ జీవిత విధానం నేటి మన ఆధునిక జీవిత విధానాన్ని కలిపి మనం  అనుసరించాల్సినవి చర్చించుకుంటూ వీలున్నంతవరకు పాటించే ప్రతిదాని వెనక శాస్త్రీయమయిన కోణం ఏదయినా ఉందేమో తెలుసుకోవడం ...ఆ తర్వాత నిజాయితీగా అనుసరించడం.

1. అలవాట్లు/ఆచారాలు: ఈ విభాగం లో మొట్టమొదటిది...

ప్రతి పూటా కృతఙతా భావంతో ఉండటం...అలాగే దేవుని ప్రార్ధనతో రోజు ఆరంభించడం.

ఉదయం నిద్ర లేవగానే అరచేతిని చూసుకుంటూ  ఈ శ్లోకం చదువుకోవాలి

కరాగ్రే వసతే లక్ష్మి కర మధ్యే సరస్వతి
కరమూలేతు గోవిందః ప్రభాతే కర దర్శనం

ఇలా చదవటం వలన ఏమిటి ప్రయోజనం?

ఉదయం నిద్ర లేవగానే ఆలాగే రాత్రి నిద్ర పోయేముందు మనం ఏ మాటలు అయితే వింటామో, ఏ దృశ్యాన్ని చూస్తామో వాటి ప్రభావం మన మీద ఉంటుంది. అంటే ఉదయం నిద్ర లేవగానే అలాగే రాత్రి నిద్రపోయే ముందు మంచి మాటలు వినాలి  మంచి దృశ్యాలు చూడాలి. అందువల్లనే ఉదయం నిద్ర లేవగానే, రాత్రి నిద్రపోయేముందు

దైవ ప్రార్ధన చేసుకోవాలని పెద్దవాళ్ళు చెప్పారు.

అయితే ఏదో ఒక దైవ ప్రార్ధన చేసుకోవచ్చు కదా ఈ శ్లోకమే ఎందుకు చదవాలి?

ఉదయం నిద్ర లేవగానే చదివే శ్లోకం, స్నానం చేసేటప్పుడు, భోజనం చేసేటప్పుడు , రాత్రి నిద్రించేటప్పుడు వేరు వేరు శ్లోకాలు చదువుకోగలిగితే మంచిదే లేదా కనీసం ఉదయం నిద్ర లేవగానే, అలాగే రాత్రి నిద్రించేటప్పుడు ఈ శ్లోకాన్ని చదువుకోవడం అలవాటు చేసుకోండి.

కరాగ్రే వసతే లక్ష్మి కర మధ్యే సరస్వతి
కరమూలేతు గోవిందః ప్రభాతే కర దర్శనం

నేను ఏ అరచేతిని చూసుకుంటున్నానో ఆ అరచేతికి ఉన్న వేళ్ళ చివరి భాగం లోనాకు లక్ష్మి దేవి కనిపిస్తోంది.

అరచేతి మధ్యలో నాకు సరస్వతి దేవి దర్శనం ఇస్తోంది.

కరమూలేతు గోవిందః ఆంటే నా అరచేయి ప్రారంభం అయిన మణికట్టు దగ్గర గోవిందుడు అనగా సాక్షాత్తు

శ్రీనారాయణుడిని దర్సిస్తున్నాను.కాబట్టి ఈ అరచేయి కేవలం అరచేయి కాదు. ఈ అరచేయి ముగ్గురు దేవతలకు ఏర్పాటు చేసిన సింహాసనం అని అర్ధం.

ఇంత అర్ధం ఉన్నందువల్లనే ఉదయం నిద్ర లేవగానే అరచేతిని దర్శించుకుంటూ ఈ శ్లోకం చదువుకోవాలని పెద్దవాళ్ళు చెప్పారు. 

చేతి అయిదు వేళ్ళు పంచభూతాలకి సంకేతం. ఈ పంచభూతాలను నా అరచేతిలో కనిపిస్తున్న దేవతలు అదుపు చేస్తుంటే ఆ పంచభూతాల అదుపులో ఉన్న నాకు ఈ కష్టము కలగకుండా ఉండాలని దేవతలను ప్రార్ధిస్తున్నాను..

ఇలా చేయడం ఆరంభించిన కొద్ది రోజుల తర్వాత నేను మంత్ర శక్తి గురించి చదవడం జరిగింది. కొన్ని శ్లోకాలు నేర్చుకోవడం, కొన్ని పద్యాలు కంటస్తం చేయడం మొదలు పెట్టాను. మదురై లో ఉండే మా గురువుగారు నాకు ఒక మంత్రం ఉపదేశించారు. ఆ మంత్రం కూడా రోజూ జపించడం మొదలుపెట్టాను.

సైనస్ తో బాధపడే నేను ఎటువంటి మందులు వాడకుండా యోగ, ప్రాణాయామంతో పాటు ఈ శ్లోకాలు , మంత్రం జపించడం మొదలు పెట్టిన నాటినుంచి  సైనస్ కంట్రోల్ అయ్యింది. అలాగే ఆందోళన, వ్యాకులత కూడా బాగా తగ్గింది.
ఏ విషయం గురించి అయినా ఆలోచించేటప్పుడు నా ఆలోచనల్లో చాల స్పష్టత ఉంటోంది. 
మాకాలనీలో కొంతమంది చిన్న పిల్లలికి హనుమాన్ చాలీసా నేర్పించి రోజూ పొద్దున్న లేచి స్నానం చేసి చాలీసా చదివాకే ఏ పని అయినా చేయాలని చెప్పాము.వాళ్ళు కూడా వాళ్ళ పెద్దవాళ్ళ సహకారంతో చక్కగా చాలీసా నేర్చుకున్నారు. రోజూ చదవడం మొదలుపెట్టారు.ఇలా మొదలు పెట్టిన కొద్ది రోజుల్లోనే ఫలితం కనిపించింది.ఆ పిల్లల తల్లి తండ్రులు ఇదివరకు కన్నా ఆ పిల్లల్లో ఏకాగ్రత పెరిగింది అని , అల్లరి తగ్గింది అని  , పెద్దవాళ్ళ మాట చక్కగా ఆలకిస్తున్నారు అని చెప్పారు. ఈ మాట విన్నప్పుడు చాల సంతోషంగా అనిపించింది.

తర్వాత నా స్నేహితురాలు ఒకరికి అస్తమా ఉంది. పిల్లి కూతలు అవి చాలా అవస్థ పడుతూ ఉంటుంది. తన మీద నేను ఈ ప్రయోగం ఇప్పుడు చేస్తున్నాను .రోజూ ఇంట్లో గట్టిగా  విష్ణు సహస్ర నామం చదవమని చెప్పాను. తను కూడా వెంటనే ఆరంభించింది. ప్రస్తుతం తన పరిస్థితి కొంత మెరుగుగా ఉన్నది. శ్లోకాలు, పద్యాలు, మంత్రం జపించడం, దైవ ప్రార్ధన ఇవి అన్ని మన పెద్దవాళ్ళు చెప్పినట్టు జీవితం మీద , ఆరోగ్యం మీద , మనవ సంబంధాల మీద ఎంతో ప్రభావం చూపిస్తాయి అని నాకు అర్ధం అవుతోంది. వాళ్ళందరికీ శతకోటి నమస్కారాలు.

అలాగే రోజూ ప్రొద్దున స్నానం చేశాక తప్పని సరిగా పెద్దలకి, ఇష్ట దైవానికి నమస్కరించటం. కోరికల చిట్టా చెప్పుకోవటానికి కాదు! జన్మనిచ్చినందుకు ధన్యవాదాలు చెప్తూ, సన్మార్గంలో నడుస్తానని చెప్పుకోవటానికి